بدلا من ان تفكر الحكومة فى الغاء الدعم, أحب ان الفت نظر سيادتها الى ان الدعم لا يحتاج الى الغاء بل يحتاج الى دعم.
وإن كان لابد من الغاء الدعم اذا كانت دى الاوامر يعنى ( احنا مش بنعترض ) يبقى الافضل ان يتم الغاء المواطن المصرى الغلبان
( ما هى بقى مش فارقة ).
كل يوم احاول أروح من مكان لمكان فى القاهرة المحروسة يزداد كرهى للبلد والشعب وكل حاجة ما عدا الحكومة طبعا لانها كفاية عليها انها وفرت لى مواصلة اركبها ( جاتنا القرف ).
زحمة فى كل مكان – بلا مبالغة – فى كل مكان اروح شارع الاقيها زحمة والعربيات واقفة اروح شارع تانى كانى لسه فى نفس الشارع الاولانى واذا كان مش فيه زحمة فان الراجل المصرى بذكاؤه وفهلوته هوة اللى بيعمل الزحمة ويعطل الطريق ( اشمعنى هوة ).
بس اجى فى الاخر واحترم الراجل ده ( اللى انا بكرهه أصلا ) وازاى انه قادر يتغلب على كل الزحمة دى والعطلة دى وتلاقيه واقف فى المترو أو مستنى الاتوبيس ولا اكن فى حاجة.
على فكرة أنا واحد من الشعب ده।
سعادة الوزير ( هوة مش وزير ولا ايه ) الدكتور زاهى حواس قال فى مؤتمر ( عالمى ) إنه سيتم نقل جسم مومياء توت عنخ امون من التابوت الذهبى والتى ظلت به المومياء منذ اكتشافها فى العشرينيات من القرن الماضى إلى صندوق زجاجى ( مخصوص ) وذلك ( حفاظا ) على جسم المومياء من ( الضرر ).
بعد هذا التصريح تمنى المواطن المصرى أن لو كان (مومياءا) ليحظى بهذا الاهتمام البالغ ( لجثة ) ميتة, بينما لم يلقى هو المواطن ( الحى ) ربع هذا الاهتمام.
فعلا مصر تاريخ وحضارة سبعة الاف سنة
