العمر فايت بيقول اه.. والقطر فايت بيقول توت.. علي المحطة يا ولداه.. حتى المحطة كمان حتفوت

Monday, February 25, 2008

زيت دوت سكر

مع انهم بيقولوا عليا متشائم
وإن أنا مسود الدنيا أكتر من اللازم
مع إنى مش شايف فرق بين الاسود اللى أكتر من اللازم والاسود اللى أقل من اللازم
اهو كله إسود
رغم ده إنما أنا ساعات تيجيلى أوقات كدة والعياذ بالله كدة
أتفاءل
والله بتفاءل !!!
بس تقريبا كلمة ساعات اللى كتبتها دى عمرها ما بتكون أبدا ساعات
هى يا دوبك دقايق
وبعدين
ترجع ريما لعادتها السودة
اللى هى ايه؟
أكتر من اللازم
برافو
اخر مرة بقى حسيت فعلا انه مفيش فايدة
أو حسيت مرة مليون انه مفيش فايدة
لأن ده تقريبا الاحساس اللى عندى على طول
يوم ما عرفت ان الزيت غلى
يا جدعان ازازة الزيت بقت باتناشر جنيه
يا انهار اسود
اتناشر جنيه
واى نوع ده النوع التعبان اللى هوة لونه بيكون اسود كدة
برده اسود
الواحد كان ظبط نفسه انه خلاص فكر يتنيل ويتجوز
وأهى جت مشكلة تانية
سيبك من الشقة والشبكة والعفش والحاجات الهايفة دى
دلوقتى ممكن الجوازة تبوظ علشان الزيت
الازازة دى؟
أيوة
مين بقى اللى هيبقى عليه الزيت ؟
العريس ولا العروسة
مشكلة فعلا
وأكيد بعد كدة هيكون الاتفاق بين العيلتين على أن العروسة عليها المطبخ والزيت
والعريس يشيل الشقة والعفش و....... السكر.

Saturday, February 23, 2008

يعنى ايه كلمة وطن

يعنى ايه كلمة وطن
لأ مش قصدى محمد فؤاد
بجد يعنى ايه مصر
ويعنى ايه لما الواحد يقوللى تعالى نحب مصر
ما أنا بحبها يا عم
قعدت أفكر كدة فى كلمتى دى
يعنى ايه أنا بحب مصر
وهى مين مصر دى اللى أنا بحبها
أكيد مصر دى مش أشخاص
وإلا لو هى الحكاية كدة
كانت مصر اختفت من زمان بموت الاشخاص دول
ومصر برده أكيد مش جماد
أقصد يعنى جبال وأهرامات وعجائب الدنيا وحاجات من دى
وبرده أكيد مصر مش هى المنتخب الوطنى
ومحدش يقوللى مصر مبارك
علشان هى لو كدة يبقى
...............
ولا بلاش
محمد فؤاد قال
يعنى ايه كلمة وطن
يعنى أرض
حدود
مكان
ولا حالة من الشجن
أنا عايز أعرف
لما حد ييجى يقوللى مصر هى ايه
أقوله ايه؟؟

ح.ر.ي.ة

مرة تانية
ولن تكون الاخيرة
يساء الى الرسول صلى الله عليه وسلم
رسول مليار ومئتان مليون مسلم
ولا يتحرك أحد
بدعوى الحرية
يقومون بنشر تلك الرسوم
وبدعوى الحرية يدافعون عن من يعترض على نشر تلك الرسوم
حرية ايه دى؟؟؟
حرية ايه دى اللى تنتهك خصوصيات الاخرين
ايها السادة الأحرار
تظل الحرية موجودة طالما لم تصطدم بحدود حريات أخرى
فإن حدث ذلك التصادم
بقت فوضى
عذرا رسولنا الكريم
ستهان مرات عدة فى المستقبل
فاغفر لنا تقصيرنا وتقصير أولى الأمر منا

Tuesday, February 12, 2008

كارفور

شاءت بى الاقدار أن أذهب الى كارفور المعادى
وطبعا الموضوع ده مش على طول
لأنى باعتبر ان مرواحى كارفور ده خروج وسهرة وحاجات من دى
مش تسوق وكلام فاضى
مع ان الاسعار رخيصة جدا وفى منتاول الجميع
ولو كانت مش فى منتاول الجميع فهى فى متناولى أنا
يعنى مثلا بنطلون بألف وستميت جنيه يا بلاش
ده كمان عليه تخفيض عشرة فى المية
ولا الجاكيت ده
تحفة
بكام ده؟
ستميت جنيه
المشكلة بقى فين؟
ان رغم الاسعار دى
الاقى الناس بتشترى والعربيات ما شاء الله
والظاهر والله اعلم ان مفيش فقراء فى مصر وان الناس كلها مستواها عالى ما شاء الله
بس الناس هية اللى بتحب تخبى علشان الحسد
ربنا يبعدنا عن كارفور ومرتاديه