مش عباسية أبدا

العباسية

أول ما بنسمع الاسم ده نفتكر حاجة واحدة بس

طبعا ما فيش غيرها

السرايا الصفرا

عباسية عباسية

يبقى مجانين والمجانين

بس ده بقى أنا شايف انها متستحقش ده بعد اللى شوفته الاسبوع اللى فات

كنت راجع من روكسى

ونزلت فى العباسية

علشان بعد كدة أروح المعادى

روحت موقف العربيات بتاع حلوان

وما دام انت رايح المعادى بتركب حلوان ليه

؟

علشان مفيش عربيات المعادى يا عم الناصح

ما علينا

قربت من الموقف لقيت حاجة غريبة جدا

أول مرة أشوفها فى موقف

مفيش ولا عربية

هوة دة اللى مش بتشوفه فى أى موقف يا عم الأمور

لأ طبعا

ده اللى بشوفه على طول فى أى موقف

بس بقى الغريب إنى شوفت طابور طويل

ييجى سبعين واحد

واقفين فى طابور متعرج كدة

أنا استغربت جدا وقلت هوة انا فين

بس بسرعة تداركت نفسى وعملت نفسى واخد على الكلام ده

ورحت وقفت فى اخر الطابور

وحاولت اقفل بقى المفتوح ده

وقلت لنفسى

أول ماتيجى عربية هتلاقى الناس كلها على باب العربية

وبعد كدة هيتقفل بقى لوحده

من غير ما اتعب فى قفله

وجت العربية

لقيت الناس زى ما هى

اتفتح الباب ركب اربعتاشر واحد

اتقفل الباب

مشيت العربية

واتفتح بقى تانى

لم نسلم برده من الناس اللى عدت علينا

وأمطرتنا بالتعليقات الجميلة

ملهم دول

فى ظابط معلم عليهم ولا ايه؟؟؟

هاهاهاهاها

ببص ورايا لقيت

ييجى عشرين واحد واقفين ورايا

والله

فى خلال خمس دقايق ركبت ومشيت

يبقى المشكلة بقى فين؟؟؟

متهيألى ان الناس دول مصريين برده

وكانوا واقفين بمزاجهم

محدش قالهم اعملوا كدة

يبقى المشكلة فين ؟؟؟

أكيد فينا برده

يبقى بعد كدة لما بسمع العباسية

بتصعب عليا

مظلومة يا مجنونة

دعم الدعم

بدلا من ان تفكر الحكومة فى الغاء الدعم, أحب ان الفت نظر سيادتها الى ان الدعم لا يحتاج الى الغاء بل يحتاج الى دعم.
وإن كان لابد من الغاء الدعم اذا كانت دى الاوامر يعنى ( احنا مش بنعترض ) يبقى الافضل ان يتم الغاء المواطن المصرى الغلبان

( ما هى بقى مش فارقة ).

بيييب بيييب

كل يوم احاول أروح من مكان لمكان فى القاهرة المحروسة يزداد كرهى للبلد والشعب وكل حاجة ما عدا الحكومة طبعا لانها كفاية عليها انها وفرت لى مواصلة اركبها ( جاتنا القرف ).
زحمة فى كل مكان – بلا مبالغة – فى كل مكان اروح شارع الاقيها زحمة والعربيات واقفة اروح شارع تانى كانى لسه فى نفس الشارع الاولانى واذا كان مش فيه زحمة فان الراجل المصرى بذكاؤه وفهلوته هوة اللى بيعمل الزحمة ويعطل الطريق ( اشمعنى هوة ).
بس اجى فى الاخر واحترم الراجل ده ( اللى انا بكرهه أصلا ) وازاى انه قادر يتغلب على كل الزحمة دى والعطلة دى وتلاقيه واقف فى المترو أو مستنى الاتوبيس ولا اكن فى حاجة.
على فكرة أنا واحد من الشعب ده।

توووووت

سعادة الوزير ( هوة مش وزير ولا ايه ) الدكتور زاهى حواس قال فى مؤتمر ( عالمى ) إنه سيتم نقل جسم مومياء توت عنخ امون من التابوت الذهبى والتى ظلت به المومياء منذ اكتشافها فى العشرينيات من القرن الماضى إلى صندوق زجاجى ( مخصوص ) وذلك ( حفاظا ) على جسم المومياء من ( الضرر ).
بعد هذا التصريح تمنى المواطن المصرى أن لو كان (مومياءا) ليحظى بهذا الاهتمام البالغ ( لجثة ) ميتة, بينما لم يلقى هو المواطن ( الحى ) ربع هذا الاهتمام.
فعلا مصر تاريخ وحضارة سبعة الاف سنة

خبرين وخبر

الخبر الأول

متوسط استهلاك المواطن المصرى من اللحوم حوالى ستة عشر جراما

ملحوظة: الحد الادنى لاستهلاك اللحوم حوالى أربعة وستون جراما

الخبر الثانى

الامم المتحدة: عشرون بالمائة من الشعب المصرى يعيشون فى فقر مدقع

ملحوظة: عشرون بالمائة تعادل خمسة عشر مليونا

يعنى بالصلاة على النبى كدة عدد سكان سوريا

الخبر الحلو بقى

عشرة مليارات جنيه قيمة فواتير المحمول للشعب المصرى

حاجة تفرح

من هذه الاخبار نستنتج أن

الشعب المصرى صاحب مزاج

وهو المطلوب اثباته

الحمد لله

الحمد لله الذى عافانا مما ابتلى به غيرنا وفضلنا على كثير ممن خلق تفضيلا

*

*

*

فعلا

وعلى رأى المثل اللى يشوف بلاوى الناس تهون عليه بلوته

فى أوقات كتير أوى

الواحد بيكون مش راضى عن حاله

سواء كان ده تقصير منه

أو

بسبب حد تانى

بس فى النهاية

الواحد يرجع ويتذكر قول الرسول عليه الصلاة والسلام

عجبا لأمر المؤمن إن أمره كله له خير وليس ذلك لأحد إلا للمؤمن إن أصابته سراء شكر فكان خيرا له وإن أصابته ضراء صبر فكان خيراً له رواه مسلم

هذا الكلام الى شخص معين *

الحق مش عليهم

مرة واحد صاحبى قاللى

شفت الاعلان بتاع الحزب الوطنى بتاع البطالة

قولتله لا

قاللى خسارة فاتك ده مالوش حل

تصدق بالله انه خلانى اعيط على حالى

قولتله يا عم ماتحبكهاش

قالوا فيه ايه يعنى

قاللى ده ميتحكيش ده لازم تشوفه

وبما ان انا مبتفرجش على التليفزيون المصرى

لانى بقيت من اصحاب الوصلات

يعنى كله دش وشوتايم وايه ار تى

فقلت ان ده صعب يحصل

بس اهو حصل

مرة واحنا على الفطار مستنيين المغرب يأذن

ومش عارفين هيأذن امتى

قلنا نجيب اى قناة مصرية نشوف الاذان وبعدين نكمل

فجبنا الفضائية المصرية

طبعا ده على الوصلة

وقبل الفطار

سبحان الله

تلاقى الاعلان

انت قاعد على القهوة بتعمل ايه؟

مش لاقى شغل

مين قال كدة ؟

روح اشتغل زى فلان فى مصنع النسيج و...

لا لا أصل انت متعرفش أنا معايا شهادة عليا فى ...

شهادة ايه ।؟

قوم واشتغل

والحق القطر قبل مايفوتك

شوف فلان لحق القطر واشتغل

ودلوقتى شوف بقى ايه؟

الفرصة قدامك

يتروح تلحق القطر زى ناس كتير ناجحين

يالقطر هيفوتك

خلص الاعلان

بس بعد ما ساب رقم تليفون كدة نتصل بيه

صاحبى قال انه كان هيعيط لما شاف الاعلان

انا بقى فطرت على الحزب الوطنى والناس اللى عاملة الاعلان

مع ان كان فيه بلح

شهادة عليا يا ناس يشتغل عامل فى مصنع ملابس

لا حول ولا قوة الا بالله

هنرجع تانى لنظام التعليم

غيرووه وخلاص

اعملوا حاجة اسمها بكالوريوس خياطة ملابس

وبلاها التجارة والاداب

وبما انى ليا تجربة شخصية مع حكاية ان الواحد يشتغل عامل دى

وعارف اللى ممكن يحصل للواحد لو حد فكر انه يقوله الكلام ده

فربنا معاكوا يا مصر

مصر

انا افضل ان الواحد يترمى تحت قضيب القطر

ولا يلحقوا

اعلانات مبوبة

مطلوب عريس

فى منتصف العشرينات

وسيم

ضحوك

يعمل اما مهندسا أو دكتورا

لديه شقة فى مكان مميز

يمكن ان تكون على الاقل مائة وخمسون مترا

طبعا سيارة

على الاقل موديل هذا العام

لديه وقت فراغ

على الاقل عشر ساعات يوميا

الاستعداد للخروج والتنزه فى أى وقت

*

*

*

اللى يلاقيه يا ولاد الحلال

يجيبه الجامع

و

وتحيا الحكومة

السماء والارض

المفروض ان ده مش يتكتب هنا

اللى اتفرج على ماتش الاهلى واسيك الاخير

وشاف عماد متعب وابوتريكة

واللى عملوه الاتنين

يقول

ان ده فعلا الفارق بين

الواحد اللى قريب من ربنا

والواحد اللى قريب من

.................

وأنا كمان

أصابه ضرر نفسى ومادى رهيب

بسبب ما كتبه ابراهيم عيسى

فرفع دعوى ضده الى النائب العام

لان ما كتبه لم يكن صحيحا من وجهة نظره

و

أنا كمان

أصابنى ضرر نفسى

لان ما كتبه ابراهيم عيسى لم يكن صحيحا

حد فاهم حاجة

احيانا

بل

فى كثير من الأحيان

يكون دفن الرأس فى الرمال هو الحل الأمثل

حتى تمر المواجهة بسلام

يمكن أن مرورها لم يغير من الأمر شيئا

ولكن

يكون من الافضل عدم المواجهة

لاننا

يمكن ان نخسر الكثير من جراء تلك المواجهة

رمضان جاااااااى

اللهم بلغنا رمضان

اللهم أعنا فيه على العبادة

ظاهرة

كانت تتحدث عبر الهاتف وتقول :

لقد أصبح الحجاب ( ظاهرة ) من مظاهر الحياة

ونتج هذا بسبب التشدد الدينى الموجود فى مصر

بس

*

*

*

*

الظاهر إن انا كنت فاهم غلط

كنت بحسب الحجاب فرض

الطموح والطمع

الطموح والطمع

ساعات بيجيللى احساس أن مفيش فرق بين الطموح والطمع

طبعا هتقوللى : فيه فرق

الواو والحاء والعين

مش قصدى يا ظريف

الواحد لما يبقى طموح

وعايز يبقى ويبقى

ألاقى ناس بتقول يا عم انت طماع ليه؟

احمد ربنا على اللى انت فيه

انت يابنى أحسن من ناس كتيرة

بص لفلان عامل ازاى

وبص لعلان حالته متنيلة بستين نيلة

ازاى بقى أكون طموح ومش طماع

الواحد بينه وبين نفسه بيقول ان لما الواحد يدور على الاحسن يبقى اسمه طموح

أما ده بيكون طمع فى نظر الناس

يجيللى أوقات أقول ان فيه فارق كبير بين الاتنين

زى السما والأرض

أو الأهلى والزمالك

- محدش يزعل -

وأوقات تانية احسن ان الفرق بينهم زى الفرق بين الشمام والكنتلوب

أو الطماطم والبنادورة

هى هى

ممكن يكون الفرق ان الطماطم اشتريتها

والبنادورة سرقتها

هل ممكن يكون الفرق بينهم فى شرعية الوصول للمكان الافضل؟

ازاى الواحد يكون قنوع وطموح ؟

مش كدة ؟

ما استحق ان يولد من عاش لنفسه فقط

واكتمل العقد

اخيييييييييييييييييييييييييرا

ياااااااااااااااااااااااااه

حمل وانزاح

مبروووووووووووك

واهلا بيك يا بيشو انت وصالح فى القطاااااااع..... بتاعنا

أى حاجة عايزها قول ومتخفش

أنا وراك

طبعا سيادتك مش هترد الا بعد اسبوعين

وهترجعلنا اسود يا ريس

سلملى على الجو الجميل اللى فى الصحرا دلوقتى

ايه دى اس ال

بعد تصريح السبد المهندس طارق كامل وزير الاتصالات بأن الهدف من القرار الاخير الخاص بتقليل اسعار النت هو

مساعدة المواطنين محدودى الدخل فى التمتع بخدمة الانترنت

.......

قام المواطنين بمظاهرة حب وشكر للسيد الوزير مطالبين سيادته بتكملة جميله

وتوفير اجهزة كمبيوتر لهم

****

ملحوظة : المواطنين المشار اليهم هما اللى معندهومش مية

نظارتى الملونة

يقول الامام على ابن ابى طالب كرم الله وجهه

ان قضاء الله ماضى رضيت ام ابيت

، فخير لك أن ترضى

و

علمت أن رزقي لن يأخذه غيري فاطمأن قلبي

فى ذكرى الثورة

ماذا تعنى هذه الصورة ؟

هل يبدو الامر خطير

أم

يا عم انت هتكبر المسألة ليه

تعليقى فى النهاية

يحدث فى مثل هذا اليوم

يحدث فى مثل هذا اليوم 23 يوليو
فى التليفزيون
اذاعة فيلم أيام السادات
اذاعة جميع اغانى الثورة فى كل وقت
قبل النشرة وبعدها
( الدكتور اللى بيقول )
واقطع المساسل واحشر اغنية عبد الحليم حكاية شعب
ولا مانع من اضافة مقاطع من اغنية يا بلدنا لا تنامى
اذاعة كلمة الريس لايف
وتعاد فى نشرة 3
ونشرة 6
ونشرة 9
واحداث 24 ساعة
وذلك تسهيلا على المواطنين لحقظها
اعادة حلقة اختراق بتاعة عمرو الليثى اللى عملها من عشر سنين
كل البرامج تقعد تزيد وتعيد فى هل السادات كان فى السينما ولا كان بيتفرج على الماتش فى الاستاد يوم الثورة ؟
العاشرة مساء
والقاهرة اليوم
يتبادلون الضيوف
( اللى هما برده جم قبل كدة )
ويحدث أخيرا فى هذا اليوم
بما ان اليوم ده اجازة
هنلعب كوووووووورة بعد الفجر على طول
حد عايز ييجى؟

من أين تشرب هذا المساء؟

من خلال متابعتى للاخبار المحلية فى الايام الماضية

أدركت مغزى اذاعة اغنية شيرين ( مشربتش من نيلها ) فى هذه الاوقات

ربما تكون الطريقة المثالية لشرب المياه

بسة ونانى

أصدقائى المشاهدين
أهلا بكم فى برنامجكو
مشوار حياة نجم
( تصفيق )
المذيعة بترقب وتشويق
النهاردة معادنا مع نجمة ولا كل النجوم
( قصدها من بره المجرة )
نجمة غير الكل
طلتها على الشاشة ليها معنى
( مش عارف يعنى ايه )
اسمها فيه معانى الحب والسعادة
( يمكن تكون حبيبة )
الحزن والكأبة
( الله ...يمكن زعلانة أوى )
اسم بيجمع كل الاحاسيس
( ده الساميشن بتاع الاحصا ولا ايه )
مشكورة قدرت تتخلى عن مسئوليتها لبعض الوقت
وتيجى لغاية عندنا
( الطريق طويل )
وعلشان كدة مش هنطول عليها
المذيعة باعلى صوتها
معانا ومعاكو
النجمة المتألقة
.........بسة.........
هيييييييييييييييييييييييييييه
( تصفيق )
ملحوظة :
وقفت النجمة قرابة الربع ساعة تحيى الجمهور الحاضر فى الاستوديو
( ربما لتستعرض الفستان .. أو ما تبقى منه )
و أخيرا
أهلا بيكى وسط جمهورك اللى بيحبك
والله وانا كمان بحبكوا جدا
( مش عارف ليه )
يا ريت تقوليلنا انت فين من زمان
( وانتى مال أهلك )
النجمة مبتسمة
والله يا نانى ( ده اسم المذيعة ) مشغولة كتير
بشتغل ( خلى بالك من كلمة بشتغل ) فى أعمال كتير علشان رمضان وانتى عارفة يا نانى
رمضان ده هو الشهر اللى بترفع فيه الاعمال والناس يتشتهر على الفاضى والمليان والنص نص والكوباية مقلوبة
طب يا ترى هتقدملنا ادوار جديدة ؟
النجمة بسهوكة
أنا خايفة موت والله يا نانى .
أول مرة أقدم دور بنت البلد
المذيعة بدهشة
مش معقووووووووول
اه والله أصل الدور ده أول مرة أعمله وأنا اتعودت على اداء شخصيات البنت الارستقراطية
( عليا النعمة ما تعرف يعنى ايه ارستقراطية )
( وبرده على اساس انها بنت سفير )
ويا رب يا رب يعجب الجمهور
المذيعة
أكيد طبعا
ليه شاركتى فى فيلم ( مسطول على السطوح ) على الرغم مساحة الدور البسيط والاجر القليل
أى حد فى الدنيا هيجيله العرض ده قدام كل النجوم دول لازم يوافق فورا ومش مهم الاجر ( 8 مليون جندى ) مين يبص للفلوس قدام ناس زى عبدون الساعاتى و ادهم تماتم
ناس زى لوزة فتحى وكراميلة غامدى والنجمة الرائعة مهلبية هانم
عندك حق
المذيعة
احكيلنا عن فيلمك الاخير ( معندهوش بكام ) والافيش اللى هز مصر والعالم ؟
النجمة
فيه ناس يا جماعة مش فاهمة بعنى ايه تمثيل
البوسة فى الفيلم لازم تكون ليها هدف
( فى الشبكة يعنى )
لو من غير هدف يبقى اغراء ( تسلل يعنى )
وبدل ما الناس يشجعونى بعد ما كررت لقطة البوسة دى سبعة وعشرين مرة علشان تطلع بشكل كويس ترضى الناس – بكاء مرييييييير -
( لا ملكيش دعوة عاجبانا من أول مرة )
المذيعة بحزن
يا حرااااام
امنيتك فى السنة الجديدة ؟
بس مفيش سنة جديدة احنا فى أغسطس
يعنى لما ييجى اخر اتناشر؟
اتمنى ان العالم يعيش فى سلام والاطفال تنام والكبار ياكلوا ويمونوا من غير ازعاج
وفى النهاية بنشكر الفنانة بسة على اتاحة جزء من وقتها الثمين لبرنامجنا
و...
الى اللقاء

ملحوظة : أثناء البرتامج تتكرر ظهور رسالة اس ام اس تقول
أنا ايمى شبيهة نانسى عجرم أحب أتعرف على شاب وسيم شبيه رامى عياش
وظهور بعدها 122 رسالة تحب التعرف

شكرا لاستخدامكم بلوجاية العبد لله

أه يا عيل

فجأة كدة بدون أى مقدمات

لقيت نفسى بحن لأيام الطفولة تانى

أو أيام العيال والمعيلة

اللى ماما سوزان دلوقتى بتهتم بيهم

زى ما اهتمت بينا وكبريتنا

فلقيتنى حاطط نغمة الموبايل بتاعى

أغنية

بولا بولا ااااا بالومبيلا

طيرى طيرى يا عصفورة

ونزلت من على النت اغنية ابريق الشاى

والكليب كمان

طب وده من ايه؟

لا لسه

عفاف راضى وهى بتغنى هم النم ياروحى

وكمان برنامج الاطفال ده

يلا بينا يلا يلا بينا الشموسة طلة وبتنده علينا

متهيألى كانت بتقول كدة

طب وده من ايه برده؟

وعلشان محدش يتريق علياغيرت النغمة

وخليتها

*

*

*شخبط شخابيط

لخبط لخابيط

مسك الالوان

ورسم على الحيط

أعمل ايه وياك يا حمادة

-حمادة اللى هوة أنا -

اللى عملته ده أسوأ عادة

وأسيبكوا بقى علشان توم وجيرى بدأ

ولكل العيال اهديلكم لينك الكليب بتاااااااع

ابريق الشااااااااى

هييييييييييييييه

مش بعرف

مش بعرف أكتب شعر زى الواد حلاوة

ولا حتى خواطر زى بلوجات كتيرة

لما بدخل عليها بتعقد

وعلشان كدة

أعذرونى ان أنقل من الناس الكبار اللى قالوه قبل كدة

إنسان...أيا انسان ما أجهلك

ما أتفهك فى الكون وما أضألك

شمس وقمر وسدوم وملايين نجوم

وفاكرها يا موهوم مخلوقة لك؟

عجبى

ياللى انت بيتك قش مفروش بريش

يقوى عليه الريح يصبح مفيش

عجبى عليك,حواليك مخالب كبار

وملكش غير منقار وقادر تعيش

عجبى

نأسف أفلاطون

فطرة الانسان التى فطرها الله عليها

تجعل

حلم المدينة الفاضلة

*

*

*

*

*

مستحيلا

عام فى الكايرو

النهاردة ستة وعشرين ستة

يكون بقالى النهاردة سنة بالظبط فى القاهرة

سنة فاتت كدة زى أى سنة

سنة فاتت بكل ما فيها من

حر وقرف

نفوس مش صافية بين الناس

زحمة ودوشة

غلاء فظيع فى كل حاجة

كله بيصرخ

كله بيزعق

كله بينفخ

والواحد يسأل إمال مين اللى مستريح

؟؟؟

الواحد مينكرش انه اتعرف على ناس كويسين

أكيد كنت هاخسر لو متعرفتش عليهم

بس المجمل

سنة ....

أهى عديت

متهيألى سنين السويس كانت أحسن

أو زيها

والواحد شكله كدة هيفضل فى سفر على طول

الاستعداد دلوقتى لسنة تانية

فى الكايرو

مع انى اتمنى انى لا اقيم هنا فترة اطول من كدة

مجدى مهنا يكتب

أخي جمال مبارك..هذا خطاب أسطره والله من القلب لك. ولا أهدف من ورائه أي تشكيك في النوايا أو إعادة طرح ملف التوريث بطريقة أخري.هي كلمة خالصة لوجه الله.. لك أن تقبلها أو ترفضها.. أن تصدقها أو لا تصدقها.. لكنها صادقة وكتاب الله.
يا أخي .. فكر قليلاً لو راودتك الرغبة في أن تصبح حاكماً ورئيساً لمصر.. وهذا من حقك.. كما أنه من حق أي مصري، طبقاً للقانون والدستور.. وإن كان الدستور قد سد الطريق - كما تعلم وبتدخل منك - بنسبة ١٠٠% تقريباً علي كل الشعب المصري.. لكي يفتحه علي مرشح واحد ووحيد للحزب الوطني.. سواء كنت أنت هذا المرشح أو أحداً غيرك.
أسألك: ما قيمة الكرسي الذي ستجلس عليه؟ قد تتعجب: أمجنون هذا؟!كيف لا يعرف قيمة كرسي رئيس الجمهورية؟ وكيف لا يعرف أن ٩٠% من السلطات في الدولة وباقي السلطات الأخري هي رهن إرادة ومشيئة الحاكم الفرد.. الديكتاتور؟وهي تساؤلات معك كل الحق فيها.. لكنني قصدت من سؤالي: ما معني أن تصبح حاكماً علي رأس نظام فاسد؟
أنت تعرف، وكل الشعب المصري يعرف، أنه نظام فاسد.. وأنه فاسد قبل أن يصل الرئيس مبارك إلي السلطة.. ثم أكبر وأكثر فساداً بعد أن تولاها.. وبصورة غير مسبوقة في كل تاريخ مصر.أنت تعرف أيضاً أن نواياك الإصلاحية، حتي لو كانت خالصة لوجه الله، لن تستطيع أن تغير من هذا النظام الفاسد في شيء.. فالفساد تمكن من هذا النظام، بحيث لم يعد ينفع معه الإصلاح بالترقيع.. أو ما يسمي سياسة الإصلاح التدريجي.
هذا النظام يحتاج إلي النسف.. مثل حمامك القديم.. فقد تبذل جهداً ومالاً كبيراً علي إصلاحه وترميمه.. لكنه يبقي في النهاية علي حاله.. وكل ما فعلته هو أنك أجريت عليه بعض التحسينات.. بينما كانت المصلحة تقتضي أن تنسفه تماماً.. وأن تنزل به علي الأرض.. ثم تقيم مكانه حمامك الجديد.. بأفكار جديدة وفلسفة جديدة.
لماذا يا أخي جمال॥ تتحمل أنت مساوئ هذا النظام، إذا كانت مشيئة الله هي أن تصبح حاكماً علي مصر.. دون رغبة من المصريين؟بل.. سأفترض جدلاً أن الشعب يريدك.. فلماذا تتحمل أوزاراً وخطايا وجرائم هذا النظام الفاسد؟إنني مشفق عليك.. ونصيحتي لك إذا ما وصلت يوماً إلي مقعد الحاكم أن تقتل ضميرك.. لكي لا يعذبك.. وأن تقنع نفسك بأن هذا النظام الفاسد هو جنة الله علي الأرض.. وأن الشعب يموت حباً في النظام.. ولا يرضي عنه بديلاً.. حتي تفاجأ بأنه سقط من تلقاء نفسه.. مثل عصا سيدنا داوود التي أكلها الدود

مبقاش انسان

الحقوا

الانسان طلع بيتقاس بفلوسه

مكنتش أعرف

انا كنت فاكر حاجة تانية

؟؟؟؟

من مين لمين؟

يا شعبي حبيبي يا روحي يا حبيبي ياحاطك في جيبي يابن الحلال

يا شعبي يا شاطر يا جابر خواطر يا ساكن مقابر وصابر وعال

يا واكل سمومك يا بايع هدومك يا حامل همومك و شايل جبال

يا شعبي ياللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضد تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغل لي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك وأذل اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمااااال

قالها جاهين قبل كدة

أنا كل يوم أسمع فلان عذبوه

أسرح ف بغداد والجزاير واتوه

ما أعجبش م اللي يطيق بجسمه العذاب

وأعجب من اللي يطيق يعذب أخوه

عجبي!!

فينيتو

تنبيه هام

انتخابات مجلس الشورى خلصت الاسبوع اللى فات

ولا عزاء لأى حد

تاج ايه ده ؟

بناءا على طلب السيد العزيز عاشق الروح بتمرير التاج ليا
فنشكر سيادته اولا على هذه الدعوة
ولكن الحقيقة أنا مش عارف يعنى ايه تمرير التاج ده؟

ولكن بعد الواحد ما بص فى بلوجات الناس اصحابنا
اتضح ان التاج ده حاجة معروفة ومشهورة قوى وكل الناس عرفاها
وبتتكلم على أساس انه امر معروف للجميع
حاجة كدة زى أبو تريكة – اخوانا ميزعلوش -

إلا العبد لله مش عارف عن التاج ده حاجة
ولكن أنا مش عارف ليه سموه التاج ؟
كان ممكن يبقى قرطاس؟
أو طرطور
ما علينا
نبدأ
أحب شخص لقلبك فى الدنيا

ناس كتيرة ومنهم كتير متعرفوش ده
انسان مستعدى تضحى بحياتك - ركز فى كلمة حياتك - عشانه
الناس اللى أنا بحبهم
انسان كرهته لدرجة الجنون وتمنيت لو تمسك سكينة وتنقض عليه وتغرزها فى قلبه وتقف تبص لجثته وتشفى غليل قلبك
بجد أى حد يتكلم عن الاسلام بصورة وحشة

ما هو اسم اجمل كتاب كتبه بشر قرأته ومحتفظ به حتى الآن ؟
روايات الادب العالمى للناشئين
اسم كتاب كتبه بشر برضه أنت متعلق بيه وبتقرأه كل فتره
لا تحزن
اهم جهاز منزلى انت متعلق بيه او بتستخدمه كتير؟
الكومبيوتر وقنوات سبورت الرياضية- مش التليفزيون -
مكان تحس بالراحة عندما تدخله؟
المسجد طبعا
شىء تحس بالراحة النفسية عندما تنظر اليه؟
البحر
مكان تحس فيه بالحنين الى شىء لا تدرى ماهو و ذكريات جارفة الى شىء؟
مكان مولدى
اجمل مدينة زرتها داخل مصر ؟
اسكندرية - المنصورة
أجمل مكان طبيعي رأيته داخل مصر ؟
جنوب سيناء
شخصية كارتونية بتحبها
هوة فيه غيره توم وجيرى
نوع هاتفك المحمول؟
اوعى وشك
وهات رجليك
موتورولا فى ثرى
سرعة بروسيسور جهازك؟
اه بس محدش يضحك
0.7
ايوة
سبعة من عشرة
حجم ذاكرة –هارد- جهازك؟
بقول 0.7
هيكون هارده كام
20 طبعا
المساحة التى تشغلها المواد الاسلامية على جهازك؟
20ف المية
تقريبا
أهم هدف انت واضعه لحياتك الآن؟
أن أكون انسان صالح
مواصفات فتاة الأحلام بالنسبة لك؟
مبنمش علشان أحلم
****************************

صف ما يأتى
شعورك لما بتسمع كلمة مصر ؟
بفتكر أن احنا موصلناش كاس العالم من سنة 90
شعورك لما بتسمع كلام عن اليهود؟
الاعلام جعل فطرتنا تجاه اليهود تتغير
لا فرق
شعورك لما بتشوف ظابط شرطة؟
بحس ان انا شايف واحد ناقص ( مش كلهم على فكرة بس معظمهم )
شعورك لما بتشوف الكناس العجوز فى الطريق؟
لا تعليق
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
يا ريتنى زيه
احساس يراودك فى اشارة مرور مغلقة بسبب مسئول كبير؟
حصل معايا كتير من يوم ما جيت المحروسة
اتفووووووووووووووووو
لا كدة عيب انت فى بلوج محترمة
اتفو

التاج لمين ؟؟
أنا هشوط على طول مش هباصى
انا فى التمنتاشر
أليك يا
لا حول ولا قوة الا بالله

تضارب؟؟؟

قصة

كنت خارجا من مقرعملى والنهار يلملم خيوطه تمهيدا للرحيل بينما يستعد الليل للدخول

رأيت سيدة فى منتصف العمر تستغل هذا الجو لتتمشى مع كلبها المربوط بحبل طويل بحيث يسمح للكلب بحرية الحركة

وانا أتابع حركة الكلب وهو يجرى هنا وهناك

رايتها تجلس على الرصيف

عجوز

شبه نائمة

وأمامها كرتونة عليها عدد قليل من المناديل والشرابات

مر الكلب من امامها وكانه يذلها

ونظرت اليه العجوز كانها تحسده

او هكذا خيل لى

وتابعت سيرى إلى المنزل وأنا أحاول أن أربط بين هذين الموقفين

كيف يمكن ان يتواجدا فى نفس المكان؟

فى نفس البلد؟

من حق السيدة ان تسير مع كلبها

ومن حق العجوز أن يكون حالها افضل من ذلك

تمت

لمن لم يقرأ هذه الكلمات

بنلف فى دواير والدنيا تلف بينا
دايما ننتهى ... لمطرح ماابتدينا
طيور الفجر تايهة فى عتمة المدينة
بتدور

......
مابنكتبشى الرسايل مابننتظرشى رد
لا حد فى يوم سمعنا...ولا بنسمع حد
طيور العمر تايهة فى عتمة المدينة
بتدور

....

فى عالم يعشق الخطر
فيه الطيور تهرب من الشجر
وتهرب النجوم من القمر

وتهرب الوجوه من الصور
بنلف فى دواير ندور عالامان
ونلاقينا رجعنا تانى لنفس المكان
ندور .. ندور .. ندور...
...
نحلم ...ونحلم ... بالحياة المفرحة
واتارى احلامنا بلا اجنحة

بلا اجنحة
...
ندور .... ندور ... ندور ... بجناح حزين مكسور
ساعات نشوف فى العتمة

وساعات نتوه فى النور

ساعات عيوننا بالاسى

وساعات فى ساعة الفرح منوحة

عبد الرحمن الابنودى

جماعة

العمل الجماعى الوحيد الذى يتقنه الشعب المصرى

هو

لم الأجرة فى الميكروباص

بل نفشل أحيانا فى ذلك

تعليقا على بلال فضل

انتخابات

من واقع انتخابات فاتت

الذهاب الى التصويت فى انتخابات مجلس الشورى

زى

الطالب اللى رايح الامتحان وعارف من قبلها انه

كدة كدة ساقط

علشان كدة

أنا مش هاسقط تانى

الجردل والكنكة

كنت عايز أكتب الكلام ده من زمان

واحد

الفنان الكبير العظيم عادل بيك امام
عمل مداخلة فى برنامج القاهرة اليوم
وقعد يتريق على عمرو أديب علشان بيقول ان الناس مرحتش الاستفتاء بتاع التعديلات الدستورية
وازاى يا عمرة تقول كدة
والبلد داخلة على عهد الديمقراطية
وأنا بسمع كلام الفنان العظيم
حسيت انه لا يفقه شيئا فى البطاطس
وما يعرفش التعديلات دى علشان ايه

اتنين

الفنانة الكبيرة العظيمة المتألقة شيرين
كنت بغير فى القنوات فاستوقفتنى الفنانة
تتكلم فى برنامج لمن يجرؤ فقط
عن القبر

فقلت لازم الواحد برده يستفيد من الناس دول

الفنانة تقول
مش عارفة الناس خايفة من ايه؟
التربة يا جماعة متخوفش
أنا قولت للراجل يعمللى تربة فعملهاللى
كنت بحسبها ضيقة
لكن لما قعدت فيها ومددت كدة
لقيتها واسعة وجميلة ومنورة
مش عارفة الناس خايفة من ايه؟
يا جماعة متخافوش

ولاحظت نظرات الشفقة من المذيع على ما تقوله الفنانة
انتى بتقوللى ايه بكتافك دى؟

عندما مر عليا الموقفين دول تذكرت حديث رسول الله صلى الله عليه وسلم
" يأتى على أمتى زمان يكذب فيه الصادق ويصدق فيه الكذوب ويخون فيه الأمين ويؤتمن فيه الخائن وينطق فيه الرويبضة , قالوا وما الرويبضة يا رسول الله؟
قال
التافه من الناس يتكلم فى أمر العامة
أو كما قال رسولنا الكريم

يبدو أننا فى هذا الزمان

محامى؟؟

كنت بزور خالتى اللى فى الهرم
هى مش فى الهرم يعنى
هى فى فيصل
بس أنا بحب أقول انها فى الهرم علشان اتفشخر
قال ايه الهرم دى حاجة تشرف

وانا نازل من عندها كنت لابس البدلة ومتشيك
ده طبعا الطبيعى بتاعى
لانى واد شيك
على فكرة
ده مش غرور
ده تكبر

المهم كنت لابس البدلة لانى كنت رايحلها بعد الشغل
ووقفت علشان أوقف ميكروباص يوصلنى المترو علشان أروح

وساعتها افتكرت واحد صاحبى وكلمته الشهيرة
أى واحد لابس بدلة وبيركب مواصلات يبقى شحات
مش أنا طبعا
لانى أنا بركب المواصلات دى من ناحية
التعايش مع المواطنين البسطاء
قلنا ده مش غرور
ده تكبر والحمد لله

وأنا واقف مستنى الميكروباص
قرب منى واحد كدة وقاللى
لو سمحت أروح حلمية الزتون ازاى؟
قلت فى سرى
يعنى مش لاقى الا انا وتسأله ؟
سايب كل الناس اللى من القاهرة وجاى تسأل واحد غريب
وعلشان أنا لابس بدلة
قولت عيب مردش عليه
قلتله حضرتك تركب معايا وبعدين المترو وتغير و..و..و
المهم شرحتله

رحت المترو قطعت التذكرة ونزلت علشان المحطة
لقيت الراجل صاحبنا بيقوللى
هوة حضرتك اللى كنت بتوصفلى ازاى أروح الحلمية
اه
ده بقى بيستعبط
أيوة ياسيدى هوة انا
قعد يبصللى شوية شوية
وأنا مش عارف بيبص على ايه؟
قمت مطلع الموبايل وقعدت اعمل اى حاجة قال يعنى هتصل بحد
قام الراجل قايل بدون مقدمات
أصل أنا رايح قسم حلمية الزتون
هوة انا سألتك يا عم انت
طبعا ده فى سرى
أصل اختى سابت بيت جوزها وخدت التليفزيون معاها
فجوزها قدم فيها بلاغ
فقلت لازم اتكلم برده
وكلمت حد هناك
مش عارف ايه ده اللى أنا بقوله
قاللى
أه
كلمتلها فلان باشا مأمور بولاق
تعرفه؟
هزيت راسى وقلتله لا والله
هوة انت مش هتسكت بقى
وانا رايح هناك علشان اطلعها من هناك
أصلها محجوزة
ممممم
وإيه كمان؟
يمكن الاقى حد يعرفنا هناك.

متكلمتش برده

فقرب منى الراجل وقاللى بصوت واطى
هوة حضرتك محامى؟

ابتسمت كدة ببلاهة وقلتله لا والله

الراجل أول ما سمع الكلمة رجع لورا كدة
وبصللى بصة مش كويسة

وبعدها منطقش وسابنى ومشى.

بس

فؤاد حداد

مسحراتى فى الطريق الصعب
منقراتى و كل دقه بقلب
إحنا الشعب
المصرى أول سيرة الإنسان
احنا من صخر العزيق والصبر
واحنا من طل وندى المواويل
زى ما اتعود علينا النيل
زى ما اتعود علينا العطش
يمكن خطأنا فى الزمان الطويل
كان من سبيل الرحمه والحنيه
يصعب علينا فى يوم نفارق عيالنا
وماجاش فى بالنا



فؤاد حداد

أين؟

لا أستطيع أن أحصر كم الأحداث التى لا أعرف أين الحقيقة فيها

فالاعلام يمكن أن يصور لنا موضوعا ما بشكل معين
على الرغم من ان حقيقة الموضوع يمكن أن تتواجد على الجانب الأخر

لذلك لا أهتم كثيرا بالأخبار والتصريحات فى أى مجال
لاننى على يقين أن تلك التصريحات ما هى إلا خطوة فى لعبة إن لم تكن قذرة فإن



ريحتها وحشة

واحد من الناس

مش عارف ايه اللى خليه ييجى على بالى
مش عارف والله
فجاة كدة جه على بالى وافتكرت مواقفى معاه

يوم ما كنا بنلعب ضد بعض فى دورى المدينة الجامعية ويقوللى مش هتكسبوا
وابقى قابلنى لو جبت اجوان .

ويوم ما كان ييجى يسالنى إزاى عديت فى الوصفية وأقوله زى ما هتعدى انت
بالبركة يعنى

وايام ماتشات الاهلى والمصرى
دى بقى حكاية تانية
هوة بورسعيدى مصراوى متعصب أوى
والماتشات كلها كانت لصالح الاهلى
كنت بحب اغيظه أوى

ولغاية دلوقتى فاكر الفانلة اللى كان بيلبسها
انجلترا مايكل اوين رقم 10

مصدقتش يوم ما قالولى فى الكلية ان السيد مات.
مع انى كنت لسه شايفه قبلها بيوم.

الله يرحمك يا سيد
الله يرحمك يا توتو

اللهم اغفر له اللهم ارحمه
اللهم اغفر له اللهم ارحمه
اللهم اغفر له اللهم ارحمه

سيبها لله

دع الأيام تفعـل مـا تشـاء وطب نفساً إذا حكم القضاء

ولا تجزع لحادثـه الليالـي فما لحوادث الدنيا من بقـاء

وكن رجلاً عن الأهوال جلداً وشيمتك السماحة والوفـاء

وأن كثرت عيوبك في البرايا وسرك يكـون لهـا غطـاء

دع الأيام تغدر كـل حيـن فما يغني عن الموت الدواء

قرار

قرار

زعيم الازبكية

مادة واحد

دفع كل مواطن مصرى مبلغ وقدره عشرة جنيهات

نقطة جيمى فى فرحه

ويأتى هذا فى اطار مساعدة جيمى فى تجهيز الشقة

وشراء النجف والسجاد اللى هوة مفروض على العروسة

ولا مانع من المساهمة بحلل المطبخ

زعيم الازبكية

شباب النيل

فى تراب

وسط زبالة

حر

جوة زحمة

ناس مخنوقة من بعضها

ومن نفسها

اخلاق طين

فى أرض صحرا

مع اننا زى ما قالوا

شباب النيل

إلى من يهمه الأمر

ولرب نازلةٍ يضيق لها الفتى ذرعاً

وعند الله منها المخرج
ضاقت فلما استحكمت حلقاته افرجت

وكنت أظنها لا تفرج

أصعب شىء فى الدنيا

أن تكون مظلوما و عندك القدرة على الكلام
ولكن

لا تستطيع الكلام

الإحساس بأن مهما تكلمت لن تستطيع رد الظلم
بل ويمكن ذلك يؤدى إلى


زيادة الظلم عليك

اشتغالات؟

ليه بندى الفلوس للحلاق فى جيبه؟

وليه بيقول دايما خللى يا باشمهندس ( كل حسب وظيفته ولو كان مش عارف هوة
بيشتغل ايه يقول ياأستاذ ) لما نديله الفلوس

ليه بنقول السواق دايما على جنب يا هندزة
ومبنقولش على جنب يا دكتور مثلا أو على جنب يا سيادة اللواء

ليه بنقول لأى حد يقرب للشرطة يا باشا أو يا بيه
مع ان ممكن هوة يكون ظابط مخلاة

وليه مبنقولش للزبال يا زبال

الكوحيت

مصر تقرر الغاء ديونها المستحقة على العراق

قرار الحكومة المصرية با سقاط 800مليون دولار عن العراق
ذكرنى بالفنان أحمد راتب فى دوره الخالد الكوحيت

أنا قلت لمراتى نروح نصيف فى الريفيرا

قالتلى خلينا الصيف ده فوق السطوح أحسن

أهو برده تغيير

مش عايش و عايش

الموقف سريع والوقت بيفوت

قاللى بسرعة

فين عربيتك؟

قولتله طبعا معنديش

قاللى يووووووووووووووة

هوة فى حد عايش معندوش عربية؟

هـــــــــــــــارش

فى المترو

وسيلة المواصلات المحببة لدى
يمكن علشان الواحد ممكن يروح من عين شمس للمعادى بنفس التذكرة
يعنى جندى واحد
أو علشان التكييف الحلو ده اللى تحت الأرض وبينفع فى اوقات الصيف الحلوة دى برده
وكالعادة أنا واقف
متهيألى مش فاكر مرة ركبت فيها المترو وقعدت على كرسى
حتى لو فيه كرسى فاضى برده مبقعدش
يمكن علشان بعتبر إن الناس اللى بتقعد دى هى الناس التعبانة من الركبة والبواسير
أو علشان أنا بتحرج لما اكون قاعد وفيه واحدة ست واقفة
مع إن فيه ناس كتير قاللولى يا عم صدر الطرشة
هما ايه اللى خرجهم فى البهدلة دى
بس أنا برده بعمل كدة يمكن حد من أهلى يقع فى مشوار فى مصر ويلاقى حد يقومله ويقعده مكان

طيب

نرجع لموضوعنا
وقفنا فين
اه
كالعادة كنت واقف
وعينى بتبص على شريط المحطات المحطوط فوق الباب
مسرة
مبارك
وانزل أغير خط حلوان
ولقيت ورقة ملزوقة جنب شريط المحطات اللى هوة فوق الباب ده
اعلان
الظاهر كدة
بس انا استغربت جدا لما لقيت النوع ده من الاعلانات
بيقول الاعلان ايه بقى

شركة ...... مش فاكر اسمها والله
ومتفتكروش ان أنا مكتبتهاش علشان متتحسبش إعلان على السايت بتاعى
قال ايه فى حد أصلا بيدخل عليه

نختار لك شريكة حياتك


افندم

هى كمان دى الواحد ميقدرش يختارها !!!!!! وبعدين نزلت من المترو من تحت الاعلان اللى بيقول

نختار لك شريكة حياتك

مش قصدى حاجة

الواسطة ثقافة مجتمع

كيف نتكلم عن اختفاء الواسطة والملك يولى ابنه على العرش؟؟

سوق الخضار

قرب قرب قرب


المتوفى ألف جنيه

المصاب خمسميت جنيه

يا بلاش



تعويضات ضحايا حادث انفجار مستودع الفيوم

عاجبانى أوى

فلا تأسفن على غدر الزمان لطالما رقصت على جثث الأسود كلاب

فلا تحسبن برقصها تعلى على أسيادها فالأسد أسد والكلاب كلاب

تبقى الأسود مخيفة فى أسرها حتى وإن نبحت عليها الكلاب

أنا والأستاذ أسامة سرايا

حبيبى وابن حبيبى

طول عمره

لا

مش طول عمره

ده بس لما بقى رئيس تحرير البرطمان

قصدى الاهرام

ممكن بس اعلق على اللى بيكتبه

ده بس لو مفيهاش زعل

مفيهاش

خلاص نعلق

أسامه بيه كاتبللى بخط كبير كده سؤال مهم جدا جدا جدا

كاتب إيه بقى ياعمنا

كيف ندرك القوة الحقيقية للدور الذى يقوم به مبارك فى مصر والمنطقة بامتياز؟

ممممممممممم

حد فاهم حاجة

ممممممممممممممممممممم

طبعا كلكو فاهمين

أنا بقى مفهمتش قولت اقرا ياعم المقالة وأكيد هتفهم

قريت الموضوع ويا ريتنى ما قريته

متهيألى كدة إن المعنى اللى فى العنوان صح

أنا مش هقول بأمارة إيه والكلام الفاضى بتوع الناس اللى ضد التنمية دى

بس يا ترى الدور ده بناه ولا لسه بيصب

مش فاهمين بيصب دى ولا ايه؟

وبعدين انتوا متغاظين من ايه يا فاشلين

علشان قام بالدور بامتياز

تقريبا امتياز دى والله أعلم يعنى حوالى كدة تسعة وتسعين وتسعة من عشرة فى المية يعنى نفس النسبة تقريبا

وانتوا طالعين بمادتين

حاجة أخيرة

ممكن حد يجيبلى حاجة

حاجة دى تعنى صحف - اذاعة - تليفزيون من بتوع برة بيتكلموا عن التقدير الحلو ده